Қишлоқ хўжалигига мўлжалланган ер участкаларини иккиламчи ижарага бериш тартиби қандай?
Мамлакатимизда қишлоқ хўжалиги ерларидан самарали фойдаланиш, уларни иқтисодий айланмага кенг жалб этиш ҳамда аҳоли ва тадбиркорлик субъектларининг қишлоқ хўжалиги фаолияти билан шуғулланиши учун қатор ҳуқуқий механизмлар жорий этилган. Шулардан бири — қишлоқ хўжалигига мўлжалланган ер участкаларини иккиламчи ижарага бериш тартибидир.
Иккиламчи ижара нима?
Қонунчиликка мувофиқ, қишлоқ хўжалигига мўлжалланган ер участкаларини иккиламчи ижарага бериш — ер участкасини ижарага олган шахс томонидан уни белгиланган муддатга ва ижара ҳақи эвазига бошқа жисмоний ёки юридик шахсга фойдаланиш учун беришни англатади. Бу жараён қишлоқ хўжалиги маҳсулотларини етиштириш, чорвачилик, паррандачилик ёки асаларичилик фаолиятини юритиш мақсадларида амалга оширилади.
Қандай ер участкалари иккиламчи ижарага берилиши мумкин?
Қонунчиликка кўра, қишлоқ хўжалиги ер участкаларининг айрим қисмлари, жумладан:
- дала четлари,
- ички коллекторлар,
- ариқ ва рошлар бўйларидаги ерлар
қишлоқ хўжалиги фаолиятини юритиш учун иккиламчи ижарага берилиши мумкин. Бу ерлар юридик ва жисмоний шахсларга белгиланган тартибда фойдаланиш учун тақдим этилади.
Ижара муддати
Иккиламчи ижара шартномаси тарафларнинг келишувига кўра белгиланади. Бироқ ушбу муддат ер участкасининг асосий ижара шартномаси муддатидан ортиқ бўлиши мумкин эмас.
Қайси ерлар иккиламчи ижарага берилмайди?
Қонунчиликда
айрим ер участкаларини иккиламчи ижарага беришга йўл қўйилмайди. Жумладан:
- деҳқон ва томорқа хўжаликларига берилган ер участкалари;
- жамоа боғдорчилиги, полизчилик ва узумчилик учун ажратилган ерлар;
- инвестиция шартномаси ёки давлат-хусусий шериклик асосида берилган, аммо фойдаланишга киритилмаган ер участкалари.
Шартномани
расмийлаштириш тартиби
Иккиламчи ижара шартномаси ваколатли орган томонидан махсус электрон ахборот тизими орқали давлат рўйхатидан ўтказилади. Шунингдек, шартномани расмийлаштириш учун давлат хизматлари марказлари ёки электрон платформалар орқали мурожаат қилиш мумкин.
48d84f2d-c98c-42f0-a9df-7230d6d…
Хулоса
Қишлоқ хўжалигига мўлжалланган ер участкаларини иккиламчи ижарага бериш тартиби ер ресурсларидан самарали фойдаланиш, қишлоқ хўжалиги маҳсулотлари ишлаб чиқариш ҳажмини ошириш ҳамда аҳолининг бандлигини таъминлашга хизмат қилади. Мазкур механизм орқали ерлардан янада унумли фойдаланиш имконияти яратилади.
O.Abdullayev,
Избоскан туман Адлия бўлими Давлат хизматлари маркази мутахассиси