Туманимизнинг “Зарбдор” махалла фуқаролари йиғини ўрамида жойлашган 32- мактабгача таълим ташкилотида 8 та гуруҳда 289 нафар болажонлар тарбияланади. Уларнинг сифатли таълим –тарбия олишларида, буюк қадриятларимизни улар онгига чуқур сингдиришда бу ерда тарбиячилар томонидан ташкиллантирилиб, ўтказилаётган турли тадбирлар, танловлар муҳим омил бўлмоқда.
Одинахон Мирзалиева бошчилигида болаларга таълим-тарбия бераётган тарбиячилар томонидан «14-январь-Ватан ҳимоячилари куни», “Мир Алишер Навоий бобом-ғазал мулкининг султони», “Бобур бобомиз—шоҳ ва шоир” шиори остида ўтказилган тадбирларда болалар ўзбекча шеърлар билан бирга, рус, инглиз тилларида шеърлар ва саҳна кўринишлари ижро этдилар.
Услубчи Зулфияхон Абдусаломова таълим ташкилотидаги олиб борилаётган ишлар билан таништирар экан, ёш авлодга кўрсатилаётган ғамхўрликлар, яратилаётган шароитларни 30 йиллик иш фаолияти давомида учратмаганини таъкидлади. Тарбиячи Н. Ҳамроқулова эса ушбу таълим ташкилотида тарбияланганлар ҳозирги кунда турли жабҳаларда меҳнат қилишиб, Ватанимиз куч-қудратининг ошишига муносиб ҳиссаларини қўшаётганликларини айтиб ўтди.
Тарбияда муҳим омил бўлаётган бундай тадбирлар нафақат болажонлар ўртасида балки ташкилотдаги тарбиячилар ўртасида ҳам бўлиб ўтмоқда. Бу уларнинг билимларини оширишда, бир- бирлари билан тажриба алмашишда қўл келмоқда. “Ассалом Наврўз” деб номланган адабий-бадиий тадбирда 6 та гуруҳ тарбиячилари М. Қаюмова, О. Юлчиева, М.Абдувоҳидова, Ў.Рашидова, Г. Собирова ва Н. Олимовалар ўз билим ва кўникмаларини намоён этдилар. Ўзларининг орасталик, пазандачилик, карвинг санъати бўйича маҳоратларини намойиш қилдилар. Баҳорий таомлар кўк чучвара, кўк сомса, патир ва турфа таомлар, сумалак, палов тайёрладилар. О.Эшматова, С.Усмонова, Х.Қосимова, В. Мамадалиева сингари тарбиячилар бадиий чиқишлари билан йиғилганларга хуш кайфият бағишлади.
Янгиланиш ва яшариш байрами Наврўзи оламга бағишланган тадбир жамоанинг аҳилликларини, ҳамжиҳатлик билан иш юритишларини яна бир бор намоён этди.
Иштирокчилар турли номинациларда ғолибликни қўлга киритдилар. Уларга “Зарбдор” маҳалла фуқаролар йиғини мутасаддиси Д.Мансурова эсдалик совғалари топширди.
О.Исломова.
