Ўзбекистонда президент сайлови кампанияси вақтида ташвиқот олиб бориш ҳуқуқини таъминлаш мақсадида, сиёсий партияларга оммавий тадбирлар ўтказишга рухсат берилди.
Фото: Ўзбекистон либерал демократик партияси
Бу ҳақда Республика Махсус комиссияси томонидан қарор қабул қилинди, деб маълум қилди
Соғлиқни сақлаш вазирлиги.
“Бунда сиёсий партияларга сайловчилар билан учрашувлар ўтказишда иштирокчилар ўртасида ижтимоий масофани сақлаш, тиббий ниқобда бўлиш, антисептик воситалардан фойдаланишга риоя этиш каби санитария-гигиена ва карантин талабларига риоя этишга ҳамда учрашувларга таклиф этилаётган фуқароларнинг коронавирус инфекциясига қарши эмланганлигига эътибор қаратиш тавсия этилди”, – дейилади хабарда.
Қайд этилишича, Сайлов кодексига мувофиқ, Ўзбекистон Республикаси президентлигига номзодларга ва сиёсий партияларга сайловчилар билан учрашувлар ўтказиш орқали ташвиқот олиб бориш ҳуқуқи таъминланади. Сайловчилар билан учрашувлар номзодлар ва сиёсий партиялар томонидан мустақил равишда ўтказилади.
Ўзбекистонда сайловолди кампаниясига 23 июл куни старт берилди. Президент сайлови 24 октябр куни бўлиб ўтади.
