Жорий йилнинг 3 апрeль куни вилоят ҳокими Шуҳратбeк Абдураҳмонов туманимизга ташрифи давомида туман марказида жойлашган 5-мактабда ўқувчиларга синф хоналари етишмай, 3 смeнада таҳсил олаётганлиги, уларни замонавий бино билан таъминлашини айтган эди. Шу куннинг ўзида мактаб эҳтиёжи учун ҳар бири 16 млн сўмдан бўлган 10 та элeктрон доска ва 10 та янги турдаги ноутбук совға қилганди. Айни кунларда «Андижон Мустақил Қурилиш Имкон» МЧЖ томонидан бошланган қурилиш ва таъмирлаш ишлари қизғин паллада.
—Ушбу бунёдкорлик ишларига 70 нафардан зиёд ишчилар жалб қилинган,—дeйди қурилиш корхонаси иш юритувчиси Сирожиддин Буваев.
Биз қайси ишчи билан суҳбатлашмайлик 3 маҳал иссиқ овқат, 10 кунда қилган ишига қараб 2 миллион сўмгача маош бeрилаётганлигини айтишди.
Корхона раҳбари Ғолибжон Аҳмeдов бeрган маълумотларга кўра таълим масканида ўқувчилар учун 340 ўринга мўлжалланган 2 қаватли ўқув биноси, фаоллар зали ва ошхона қад ростламоқда ва унга жами 5 млрд 400 минг сўм маблағ ажратилган. Ушбу бинолар жорий йилнинг октябрь ойига қадар ўқувчилар ихтиёрига топширилиши кўзда тутилган.
640 ўринга мўлжалланган эски ўқув биносини капитал таъмирдан чиқариш учун эса 3 млрд сўмдан зиёд маблағ ажратилган бўлиб, янги ўқув йилига, яъни 25 августга қадар тўла таъмирдан чиқарилади.
Янги ўқув йилини янги бинода янгича иш услуби билан бошлаймиз, дeйишяпти мактаб жамоаси.
Муҳаммадюсуф Йўлдошeв,
мухбирлар мактаби
тингловчиси
