— деди туман мактабгача таълим бўлими мудираси Назирахон Қобилова 16-МТТда бўлиб ўтган Мир Алишер Навоий таваллудининг 580 йиллигига бағишланган тадбирда
Амалдаги йилимизнинг 19 январидаги бўлиб ўтган маънавий-маърифий ишлар тизимини тубдан такомиллаштириш, бу борада давлат ва жамоат ташкилотларининг ҳамкорлигини кучайтириш масалаларига бағишланган йиғилишда Президентимиз мамлакатимиз мафкурасининг асосий ғоясига таъриф берар экан: «Биз яратаётган Янги Ўзбекистоннинг мафкураси эзгулик, одамийлик, гуманизм ғояси бўлади. Биз мафкура деганда, аввало, фикр тарбиясини, миллий ва умуминсоний қадриятлар тарбиясини тушунамиз. Улар халқимизнинг неча минг йиллик ҳаётий тушунча ва қадриятларига асосланган» деб таъкидлади.
Миллий ва умуминсоний қадриятлар тарбиясини мактабгача таълим муассасида болажонлар онгига сингдиришда эса туманимиз мактабгача таълим ташкилотларида самарали ишлар олиб борилмоқда. Буни биргина мисолда — 16-мактабгача таълим ташкилотида ғазал мулкининг султони Ҳазрат Алишер Навоийнинг 580 йиллигига бағишланиб ўтказилган тадбирда қалбан ҳис этиш мумкин бўлди.
Тадбир тарбияланувчиларнинг ота-оналари, жамоатчилик вакиллари иштирокида жуда қизиқарли ва мазмунли ўтди. Тадбирни устоз педагог, туманимиз халқ таълими ривожига мукносиб ҳисса қўшган Набижон Билолов қисқача кириш сўзи билан очиб берди. У ўз сўзида Президентимиз томонидан келажагимиз ворисларининг ҳар томонлама таълим ва тарбия олишлари ва комил инсон бўлиб етишишлари учун яратилиб берилаётган шарт-шароитларга тўхталиб ўтди. Ана шундай ғамхўрликка ташкилот тарбиячи ва ходимлари болажонларга аъло ўқишлари, пухта таълим-тарбия олиб, етук инсон бўлиб етишишларига муносиб ҳисса қўшишлари жавоб бўлишлигини таъкидлади.
Тадбирда бобоколонимизнинг ижодидан намуналар нафақат ўзбек тилида, балки рус ва инглиз тилларида ҳам баралла янгради. Тарбияланувчиларнинг инглиз тилида ғазалларни, ибратли сўзларни равон айтишлари, талаффузларининг мукаммаллиги инглиз тили машғулотларини олиб бораётган Диёрахон Акбарованинг ўз ишига нақадар масъулият билан ёндошишидан далолат берди. Айниқса «Шер ва Дуррож» асарининг инглиз тилида тарбияланувчилар томонидан талқини ота-оналарда катта таассурот қолдирди. Шунингдек тарбиячи Шаҳнозахон Меҳмонова ижодига мансуб ранг-баранг гуллар, кўринишлар тадбирга файз бағишлагани эътироф этилди. Тарбиячи ва ходимлар томонидан Алишер Навоий ғазали билан ижро этилган ашула ва мақомлар, рақслар, ёд айтилган ғазал ва туюқлар, ибратли сўзлар бу кунга тайёрланишда ташкилот раҳбари Барно Ҳамдамованинг самарали меҳнатини яққол намоён қилди.
Шуни эътироф этиш жоизки, ғазал мулкнинг султони Алинер Навоий ҳазратларининг таваллудига бағишланган ана шундай тадбирлар туманимизнинг мактабгача таълим ташкилотлари, мактабларда, жамоат жойларида бўлиб ўтмоқда. Бундай тадбирлар эса фарзандларимизнинг комил инсон бўлиб вояга етишларида муҳим ўрин тутади.
