41-умумий ўрта таълим мактабимизда 33 нафар тажрибали ўқитувчи 274 нафар ўқувчига сифатли таълим-тарбия бериб келмоқда. Жамоанинг мақсади Президентимиз таъкидлаганидек, ёшларни таълим-тарбия олишларида ташаббускор ва фидойилик бўйича “Устоз ва шогирд” анъаналарини шакллантира бориб, маънавий ва маърифий ишлар самарадорлигини оширишдир.
Бугунги кунда мактабимиз бошланғич синф ўқитувчилари ўқувчиларга таълим-тарбия бериш, уларнинг чуқур билим олишларига эришиш, ўтилаётган дарсларга қизиқтириш борасида бир қатор муваффақиятларни қўлга киритмоқдалар. Бу турли фан йўналишларида ўтказилаётган беллашувларда ўз аксини топмоқда. Масалан, февраль ойида туман миқёсида бўлиб ўтган “Ёш авлод” фан олимпиадасида ўқувчиларимиз муваффақиятли иштирок этдилар. 3-4 синфлар ўртасидаги фан олимпиадасида Табиатшунослик фанидан Жамшидбек Тошмирзаев, Она тили фанидан 3”А” синф ўқувчиси Мухаммаджон Жумабоев 2-ўринни эгалладилар. 3”А” синф ўқувчиси Муҳаммадшукур Абдураҳимов, 4-синф ўқувчиларидан Мавлудахон Халилова она тили фанидан, Охунжон Йўлдошев табиатшунослик фанидан 3-ўринни эгалладилар.
Мактабимизда бошланғич синф ўқитувчилари иштирокида методик йиғилишлар ўтказилиб, унда “Очиқ дарс”лар, тадбирлар муҳокама қилиниб борилади. Ҳар ойда услубий бирлашма томонидан ойлик ҳисоботлар таҳлил қилинади, йўл қўйилган камчиликларга барҳам бериш юзасидан тадбирлар белгиланади.
Ўқувчиларнинг дарслардан сўнг билим ва малакаларини ошириш, бўш вақтларини мазмунли ўтказишлари учун мактабимизда фан ва спорт тўгараклари мунтазам фаолият кўрсатмоқда. Спорт тўгаракларига қатнашаётган ўқувчилар жисмоний фаолликларини ошириб бориш, соғликларини яхшилаш билан бирга бир қатор мусобақаларда фаол иштирок этиб, фахрли ўринларни қўлга киритмоқдалар. «Саломатлик ойлиги» доирасида бир қатор ибратли ишлар амалга оширилмоқда. Спорт мусобақалари ташкиллаштирилиб, ғолиблар рағбатлантирилмоқда.
Қўлга киритилаётган ютуқлар албатта ўз-ўзидан бўлмайди. Бунинг ортида меҳнат ва тинимсиз изланиш, янгиликларни мунтазам ўқув ишларига жалб қилиш турибди. Бу борада тажрибали ўқитувчиларимиз Наргиза Абдураззоқова, Гавҳарой Нурмаматова, Гулзира Юсупова, Гавҳарой Исмоилова, Нигора Сиддиқова, Дилфуза Маҳкамова, Тўлғаной Иминовалар касбдошларига ўрнак бўлмоқдалар.
Соҳибахон ОРИФЖОНОВА,
Мактаб бошланғич синф ўқитувчиси.
