ҲИМОЯ КАФОЛАТЛАРИ КУЧАЙТИРИЛМОҚДА
Мамлакатимизда инсон ҳуқуқларининг ҳимояси, суд ва ҳуқуқни муҳофаза қилувчи органлар фаолиятида шахснинг ҳуқуқ ва эркинликлари ҳимоясининг кафолатларини кучайтириш мақсадида самарали ишлар олиб борилмоқда.
Бунга мисол тариқасида мамлакатимиз Президентининг 10.06.2024 йил кунги “Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида”ги Фармонини алоҳида таъкидлаб ўтиш жоиз ҳисобланади.
Ушбу фармонга кўра 2025 йилнинг 1 январидан бошлаб жиноят ишлари бўйича туман, шаҳар судларида тергов судьяси лавозими жорий этилди ҳамда тергов судьяларига судларда маъмурий ҳуқуқбузарликлар тўғрисидаги ишларни ва жиноят материалларини, шу жумладан санкциялар ва мажбурлов чораларини қўллаш масаласини кўриб чиқиш ваколати берилди.
Жорий йилнинг биринчи чораги давомида жиноят ишлари бўйича Избоскан туман суди томонидан 567 нафар шахсга нисбатан 509 та маъмурий ҳуқуқбузарликка оид ишлар кўриб чиқилиб, тамомланди ҳамда туман судига 51 та санкция материаллари келиб тушган бўлиб, шундан 50 таси кўриб тамомланди. Кўриб тамомланган ишларнинг 18 таси қамоққа олиш юзасидан, 31 таси тинтув ўтказиш ҳамда 2 таси почта-телеграф жўнатмаларини хатлаш юзасидан санкция материалларини ташкил қилади.
Мазкур фармон билан суд-ҳуқуқ тизимидаги бу муҳим ўзгартиришлар фуқароларнинг конституциявий ҳуқуқларини таъминлаш, жиноят ишлари бўйича судларнинг иш юкламасини камайтириш ҳамда судьяларнинг жиноят ишларини кўриб чиқиш жараёнларида қонуний, асосли ва адолатли қарор қабул қилиши учун кенг имкониятлар яратмоқда.
У. Мирзаабдуллаев,
Жиноят ишлари бўйича Избоскан туман судининг тергов суди судьяси