Бугунги глобаллашув даврида инсон тақдирига, миллат равнақига, жамият тараққиётига, ёшлар онгу шуурига таҳдид солувчи омил нима? Бу бизнинг менталитетимизга, миллийлигимизга ёт бўлган ғоялар.
Суҳбатдошимиз ҳаёт йўлларини таълим ва тарбияга, маънавият ва маърифатга бахшида қилган, нафақада бўлсада ҳамон сафда бўлган Шаҳобиддин ота Жалолов:
-Шу ёшгача не-не ишларни кўрдим. «Қизил империя»нинг қаллобликлари-ю, юқоридан йўлланган Гдляндек жаллодларнинг ваҳшийликларига гувоҳ бўлдим. Ватанимиз мустақиллиги ҳар кимнинг иқтидорини намойиш қилишга, тадбиркорлик ва ишбилармонликка кенг йўл очиб берди. Бу эса айрим нияти қораларга ёқмаётганлиги аниқ. Пана пастқамдан тош отиб, ёшларимизни йўлдан урмоқчи бўлганларнинг сўзларига асло қулоқ тутмаслик лозимлигини таъкидлашимиз даркор. Бу борада мозийга қараб иш тутиш, ундан сабоқ чиқариш кераклигини ҳар бир ёшга англатишимиз лозим. Бу порлоқ кунларга қанчалик ташна эдигу, қандай қилиб эришдик. Мустақиллигимизни асраш, мустаҳкамлаш, ҳимоя қилиш йўлида жон фидо қилганларнинг жасоратларини, матонатларини ардоғлаб, ёшларга етказишимиз керак.
Маълумки биз улуғ аждодларимиздан қолган бой мерос билан фахрланамиз. Боболаримиз Амир Темур, Мирзо Улуғбек, Заҳириддин Муҳаммад Бобур, Жалолиддин Мангуберди сингари шоҳ ва саркардалар, Алишер Навоий-у Абу Али ибн Сино, ал Хоразмий, Беруний, ал Фарғоний каби номи жаҳонга машҳур бобокалонларимиз билан фахрланамиз ва бунга ҳақлимиз. Ёшларимиз уларнинг бой меросларини ўрганар эканлар тўғри йўлни танлаб олишлари, уларга муносиб фарзанд бўлишлари кераклиги туйғуси миллий ғоямизнинг асосини ташкил этади.
Давлатимиз раҳбари жамиятда қонун устуворлигини таъминлаш, амалга оширилаётган барча ислоҳотлар самарадорлигининг кафолоти, аҳоли турмуш даражасини ошириш, мамлакатда тинчлик, тотувлик ва барқарорликни таъминлашнинг энг муҳим омили эканлигини бежиз таъкидламадилар.
Инсон учун албатта, Ватан зарур. Ватан инсоннинг орзу-умидлари, ўзлигини рўёбга чиқариши учун ҳам керак. Ватан-инсон туғилиб ўсган, улғайган, бобо ва бобоколонлари, ота-оналари яшаб ўтган ва авлодларининг тинч ҳамда хотиржам яшаб ўтиши таъминланиши зарур бўлган табаррук ва муқаддас замин. Ота-онани танлаб бўлмаганидек Ватанни ҳам танлаб бўлмайди. Шундай экан, шукроналик Ватан туйғусини ҳис этишдан, англаб етишдан бошланади. Инсон туғилиб ўсган Ватанидан йироқда яшаши, ривожланиши мумкин. Бироқ ўзи туғилиб ўсган, киндик қони тўкилган жойни унутолмайди, доимо Ватанга интилиб яшайди. Бунга мисол қилиб бир чимдим тупроқни ёнида олиб узоқларга кетганларни, шу бир сиқим тупроқни ҳидлаб унга сажда қилганларни келтириш мумкин.
Инсон ўзи қадрланган, туғилиб ўсган юртида тараққиёт ва юксалиш ҳақида улкан режалар тузаолади. Чунки миллий юксалиш ўзини, ўзлигини, миллийлигини, Ватани ва ватандошларини англаган ва қадрлаган онгли , фидойи ва садоқатли инсонларнинг ҳамжиҳатликдаги ҳаракати самарасидир. Миллий ғоясиз, маънавият ва маърифатсиз миллий юксалиш бўлмайди.
Суҳбатдош:
М. МИРЗААБДУЛЛАЕВ
