Янги тизим — қулайлик ва тежамкорлик
Бугунги кунда барча соҳаларда бўлгани каби нафақа тизимида ҳам кенг қулайликлар яратилмоқдаки, бу амалга оширилаётган ишларда ўз самарасини бермоқда. Ҳўш, бу тизимда яна қандай янгиликлар бўлмоқда? Бу ҳақда Бюджетдан ташқари пенсия жамғармаси Олтинкўл тумани бўлими муиахассиси С. Умматова шундай дейди:
— Мамлакатимизда аҳолининг ижтимоий ҳимоясини кучайтириш, нафақа таъминоти тизимини такомиллаштириш йўналишида кенг ислоҳотлар туфайли нафақага чиқиш жараёни анча енгиллаштирилган. Эндиликда фуқаролар архивма архив юриб, вақт кетказиб, нафақага чиқиш учун ҳужжатлар йиғиб юриши шарт эмас. Бу соҳада ҳам янгилик-ҳужжаларни электрон шаклда тақдим этиш амалга оширилмоқда.
Янги тизимнинг қулайлик ва тежмкорлик томонлари борми, деган савол туғилиши табиий. Албатта Давлат пенсия таъминоти жамғармаси томонидан жорий қилинган ягона электрон ахборот тизими фуқароларга иш стажи, иш ҳақи ва бошқа зарур маълумотларни онлайн кўриш имконини бермоқда. Ҳудди шу тизим орқали ариза топшириш, ҳужжат юбориш ва расмийлаштириш жараёнлари автоматлаштирилган. Бу эса фуқароларнинг вақтини тежайди.
Эндиликда Сиз нафақага чиқиш учун my.gov.uz ёки EPIGU (Электрон ҳукумат портали) орқали ариза топширишингиз мумкин.Электрон рақамли имзо ёрдамида ҳужжатлар тасдиқланади. Бюджетдан ташқари пенсия жамғармаси туман(шаҳар) бўлими аризани қабул қилиб, онлайн кўриб чиқади ва натижани ҳам электрон шаклда юборади.
Электрон тизимнинг афзалликлари беқиёс. Биринчидан ортиқча қоғозбозлик йўқ. Иккинчидан ариза ҳолатини реал вақтда кузатиш мумкин. «Аризам йўқолиб қолмадимикан?» деган хавотирга ўрин йўқ. Чунки жлектрон тизим ишонарли, ҳужжатлар йўқолиб қолмайди. Учинчидан навбатда туриб асаб бузиш йўқ. Бўлимга бориб келиш таранспорт ҳаражатлари ҳам ёнга қолади.
Биз нимага қатъий эътибор беришимиз керак? Энг муҳими —ўз иш жойимиз томонидан иш стажи ва иш ҳақига оид маълумотларни Пенсия жамғармаси электрон базасига киритилганлигини олдиндан текшириб туришимиз зарур. Албатта, ариза бериш учун электрон рақамли имзога (ЭРИ) эга бўлишимиз керак.
Демак, Электрон ҳужжатлар орқали нафақа расмийлаштириш тизими — бу замонавий, қулай ва шаффоф ёндашувдир. Бу тизим нафақат фуқароларга енгиллик яратади, балки давлат органлари фаолиятини ҳам самаралироқ қилади. Энг асосийси, ўз маълумотларимизни вақтида янгилаб борсак, нафақага чиқиш пайтида ҳеч қандай қийинчиликка дуч келмаймиз.
