Қораянтоқ маҳалласида Муҳаммадазим Бозоровлар оиласини “Янгилик яратувчилар” дея тилга олишади. Фарзандлари билан “Қораянтоқ” оилавий корхонасининг ташкил этган Муҳаммадазим ака аҳоли учун ёғочни қайта ишлаш, электр жиҳозларини таъмирлаш, пайвандчилик соҳалари бўйича хизмат кўрсатади. Ўғиллари Азизбек ва Авазбек ҳам отасидек изланувчан ва тиришқоқ.
Ўтган йили улар отаси ёнида туриб кўп қаватли уйларни бунёд этишда қўл келадиган, бир тоннагача юк кўтариш қувватига эга қурилма—кичик кран ясашди. Бу янгилик қурувчилар томонидан ижобий қабул қилиниб, ҳам вақтдан, ҳам иш сифатини оширишда катта аҳамиятга эга янгилик бўлган эди.
Яқинда Муҳаммадазим аканинг кичик ўғли Авазбек боғбонларнинг оғирини енгил қилиш учун олма мевасини қоқига тайёрлаш учун мослама дастгоҳ яратди.
-Мен интернет орқали ушбу ускуна ҳақида маълумот изладим. Фақатгина унда картошкани “чипс”га тайёрлашда ишлатиладиган ўзгача қурилма борлигини топдим. Шундан сўнг кўплаб боғбонлардан бу ҳақида сўрасам улар қоқи тайёрлашда олмалар фақат пичоқ орқали кесиб тайёрланишини айтишди. Шундан сўнг ушбу мосламани бунёд этишга чоғландим. Мана ушбу мослама дастгоҳ электр энергияси орқали ҳаракатланган ҳолда олмаларни 5-7 мм қалинликда кесиб олиб қоқи қилиш учун тайёрлаб беради. У бир соат давомида 500 кг олмани қайта ишлаши мумкин,- дейди Авазбек.
М. РУСТАМОВ.
Суратда: А. БОЗОРОВ дастгоҳ олдида.
